Dr. Kamal Ishaq

—

عجبي على اللي اتولد  وقالوا إسمه فلان

وكتبوا دينه كذا. في خانة الأديان

مش راضي ليه يعترف باللي دينه اختلف

دا شكله عمره ما عرف  إنجيل ولا قرآن

على دين أبوه اتوجد  ما كانش صاحب قرار

اكمنه لما اتولد   ماكانش ليه اختيار

يعني الديانة نصيب  ما بين هلال وصليب

أو ملة بيحددها       مولود في أنهي مكان

ورسالة الأديان  الحب والرحمة

رسالتها ليه ضاعت يا حبايبي في الزحمة؟

بقا اللي جه للخير  يجيب أذى للغير؟

عجبي على الأديان عجبي عليك يا زمان.

ضاع مننا الإحساس   وبقينا نتعارك

يا ريت يا كل الناس في الحب نتشارك

لو بس ننسى القسوة  الدنيا تصبح حلوة

والفجر نوره يبان   وتنوره الأديان

سيب كل واحد في حاله  مالكش دعوه بدينه

إزاي عرفت أنه مخطئ   ومين سمحلك تدينه

دالدين هوه الخير      وهو حب الغير

خلي التعامل ما بيننا إنسان مع إنسان

—

د. كمال فريد.