Dr. Kamal Ishaq

سرحان يا راجل ليه

أيه اللي شاغلك ايه؟

ان كان على ماضي

ارميه وراك وارتاح

عمر الهموم يابني

ما ترجع اللي راح

ون كان في مستقبل

بكره في علم الغيب

ممكن يكون اجمل

لما الجراح هتطيب

مالكشي شيء ملكك

يابني غير الحاضر

وحل مشكلتك

انك تكون شاطر

عيش حياتك فيه

وقد ما هتديه

هو كمان يديك

الحلو ويهنيك

وتفرح يا راجل بيه.

بدل ما تبكي عليه.

قوم واشتغل واتعب

وشوف ورانا إيه

مالك متنح ليه؟

شمعة ورح تنطفي وكلنا نختفي

ولا يبقى لينا وجود

واللي فات اختفى

سراب ومالهوش صفة

ولا عمره يوم هيعود

عيش بقى لحظتك.

دور على متعتك بلا غلط وحرام

وإدعي تكون آخرتك

الذ من دنيتك

وكله يبقى تمام.

واسأل على غيرك وإديله من خيرك

عشان يعيش مرتاح

والناس تعيش في سلام. وتعدي في الأيام

من غير تعب وجراح

ليه بننسى اي خير وبنفتكر الشر بس؟

مابنفتكرشي لحد غير هفوة عملها من غير ما حس؟

وبننسى تاريخه الطويل إن كان عمل أعمال عظيمة،

ولا حتى بنرد الجميل على أي ذكرى لينا قديمة.

والعنف سيطر والعواطف ماعادش ليها اي قيمة.

فين المحبة فين التعاطف ياريت نقرب ياريت نحس

فين التسامح فين التآلف؟ دا الكره زاد والحب خس

ياريتنا نرجع زي زمان ياريتنا نرجع أيام ما كان

بين البشر حب وحنان

ياريت نحب ياريت نحس

ونقول لصوت الشر “هُسْ”

ونقول لإيد الشر “بَسْ”.

مش هيا ديه القضية يسوع إله وللا بشر

القضية عنده هيا قلبك حنون وللا حجر

القضية عنده هي الحب في الناس ينتشر

القضية عنده هيا إبليس وشره يندحر

القضية كانت وصية منه للدنيا هدية

نمتنع عن الاذية ونحب كل البشرية

وننشر الخير والسلام زي ما وصى وأمر

مش هي ديه القضية يسوع إله وللا بشر

القضية عندي هي إني مسيحي وأفتخر

إني مالياش في الأذية والخير بديني بينتصر

كل الناس غلابة وحتى الديابة

كانوا أصلا غلبانين:

الدنيا قست عليهم ولا حدش حس بيهم

وكانوا مطحونين.

دي الدنيا وحشة قوي بيفجر فيها القوي

وبييجي عالضعيف،

ون فضلت البشرية ماشية في السكة ديه

مستقبلها مخيف.

ياريت تحس بغيرك ويبقى كتر خيرك وتكون معاه لطيف.

انا عارف إنك طيب والخير ليك قريب وكمان قلبك نضيف.

---

يا ريت يا ناس تحسوا بالناس وإوعوا تنسوا

الدنيا دي دوارة،

واللي انت فاكره مكسب، ساعات بيبقى مقلب،

ونهايته تبقى خسارة.

اختار طريق الخير وإسعد بحب الغير، دي المحبة شطارة.

جربها علشان تنجح، وفي الحياة دي تفلح، وتلاقي نتيجة جبارة.

دالحب هو الأفضل: بيخلي الدنيا اجمل، والعيشة تكون نوارة.

—

د. كمال فريد.