Dr. Kamal Ishaq

زجل “فيها إيه؟”.
—
قال لي سيبني ..روح وسيبني .. إنت مالك باللي فِيّا؟
د اللي مش عاجبك عاجبني .. ليه هتخربها عليا؟
روح وسيبني بلاش سماجة .. ما انت عارف كل حاجة.
وقد إيه عيشتي هنية.
—
ما انت شايف اني باكل .. ما انت شايف اني بشرب.
ما انت عارف اني عاقل .. ليه بقى عايزني أغضب؟
قوللي إيه قصدك معايا؟ ..إني أقول ده مش كفايه؟
مش هقولها مهما تعمل .. مش راح اصرخ مش هاهلل.
مش راح افتح اي دمل ..انت عايز فتنه تحصل؟
فتنه نايمة ليه .. نصحي الفتنة ليه؟ 
نعمة دايمة.. عز دايم إحنا فيه.
دقنا خيره .. أكل .. شرب .. بالهناء والشفا
هل يضيره أي ضرب؟.وللا كرت ع القفا؟
ما انت شايف من زمان .. إني باحلم بالأمان
طول ما بْقي في مطرحه .. ليه بقى راح تفتحه؟
ليه بتنغز فيٌا ليه؟ إنت عايز مني إيه؟
ما انت عارف اللي ممكن يوم يصيبني لو بحقي يوم أطالب.
ما انت شايف .. ليه بقى جاي تحاسبني .. ولا حتى ليه تعاتب؟
لو هنفتح باب مطالب .. مش هنقدر يوم نسده.
مش هيجلب غير متاعب .. للوطن ممكن تهده.
انت عايزني أشاغب؟ ولا عايزني أشاغب؟
هو انا دلوقتي عاجب؟ .. لما ابقى كمان اطالب:
بالحقوق؟ .. يا إبني فوق.
إنت عايز وحش كاسر يفترسني؟
لو هتعمل ليا خاطر روح وسيبني.
روح وسيبني .. ده اللي مش عاجبك عاجبني.
فيها إيه لو كنت أسكت
لما يبقى القول يموِّت.
—
فيها إيه لو قالوا ليا .. يوم ما خدت الثانويه:
ما بنعترفش بنمرة عالية.. هي جامعاتنا تكية؟
لسا ليها امتحان*..قرروا واحد جبان.
للخيار عنده مكان .. خد فلان وإحرم فلان.
وإعرف أبلا إسمه ايه .. وإبن بيه وللا ابن ايه.
ولا كافر إبن كافر .. ما تجوزشي رحمة يوم عليه.
فيها إيه؟ فيها إيه؟ ليه تعقدهالي ليه؟
أي حته هاخش فيها .. لما يرضوا ليا بيها
أي لقمه راح تاخدها .. الكلاب من يد سيدها.
وبرضو يبقى الشكر ليهم .. ع اللي باخده من ايديهم.

—
وفيها إيه لو كنت شاطر ..باجتهد وأسهر واذاكر
وإدوني برضو نمرة واطية؟ بس خدت شهادة عالية.
مش كفايه الشهادة والسلام؟

دي القناعه حاجه حلوه يا سلام.

يعني لازم أكون معيد؟ يعني دا حقي الوحيد؟
للأستاذيه فيه شروط:  دي الجامعة زي الأخطبوط
وصلي على النبي تفوت .. وان ما صلتشي تموت.
—
وأي مصنع .. وللا مكتب .. ولا شركة:
فيها شغلة .. أو وظيفه فيها بَركة.
فيها ايه لو ياخدوا غيري لما أقدم للوظيفة. 
اللي ليا حق فيها:
ده إسمي ما بينفعش ميري : ليه حروف صعبة وسخيفة.
وأعمل ايه انا بس بيها؟
قبل ما تخلَّص عليا .. والدنيا تسود في عينيا؟
لما تقفل كل باب ..لرزق ممكن يجي ليا.
وإن دخت مش لاقي وظيفة..عشان أدوق لقمه شريفة:
غلطة اللي اختار لي إسمي .. غلطة من أبويا وأمي.
—
وليه بس أشكي .. لما أشوف .. اني محروم من الإدارة؟
داحنا مهما يكون ضيوف .. وغيرنا صار صاحب العمارة؟
وليه أعوز بس الإدارة؟ دي أي هفوة عقابها فُوري.
وحتى لو طُلت الوزارة؟  هيبقى رأيي فيها صُوري.
وإوعى يوم تسالني ليه إحنا الضيوف؟
وللا يعني إنت ما بتعرفشي خوف؟
يا ابني اسكت ما تطالبشي.. يا ابني اسكت قوم وامشي.
—
وفيها إيه لو قلت أصلِّي .. وأبني بيت للرب وحده..
لو يقولولي تملي .. أي شيء تبنيه نهدُّه:
بيقولوها بحسن نية ..  قصدهم لا أتعب ولا انزل:
أقفل الأوضه عليا .. و أصلي في اي منزل.
بس ياخسارة الحقيقة
حتى دي ماهيش متاحة:
وصلاتنا فيه حتقيد حريقة
كإن الصلا يا ناس أباحة.
—
وفيها إيه لو مره يوصل للبيوت
صوت شتيمه أو مهاجمه بأعلى صوت
من حديث في الميكروفون .. فيه سباب من كل لون:
غلطه الودن اللي سامعة .. اللي تستاهل البوليس
د اللي هيخليها والعة .. إنت مش صاحب الحديث
وهي مرة في كل جمعة ..  يعني يوم من وسط سبعة
زيد عليهم كم مقالة .. في الجرايد والاذاعة.
بس دي يا صاحبي حاله مش بتحصل كل ساعة
زيد عليهم كام كتاب .. بس ما تسألش عنهم.
غلطة البأف اللي جاب.. من فلوسه نسخه منهم.
واللي تلفزيونه كان ..
سبب كمان خلاه يهان..
لو شاف حاجات من دي بعينيه
هوه مين فتحه بايديه؟
يبقى يشكي بس ليه؟
—
وفيها ايه لو ما أحسش بالأمان؟
ده نصيبي في البلد دي من زمان
فات علينا ألف عام وأكتر كمان
دقنا فيها القهر والموت والهوان.
—
فيها ايه بس الجديد لو طعني سيخ حديد؟
فيها ايه بس الخطير لو تصيبني الجنازير؟
فيها ايه يا ابني المخيف لو دبحني مرة سيف؟
فيها ايه لو يحرقوا لي مرة دار؟
فيها ايه لو يهدموا لي يوم منار؟
فيها ايه لو ينهبولي مرة مال؟
فيها ايه لو يخطفولي يوم عيال؟
فيها ايه لو يفضحولي يوم بنات؟
فيها ايه لو خلوا أنفاسنا آهات؟
فيها ايه: بيكرروا كل اللي فات؟
—
وفيها ايه لما أسلِّم والرد يجي بإقتضاب.
وإن قلت اسمي الناس تبلم كإن اسمي عجب عجاب.
وأحس اني جوه بيتنا غريب ولا ليش فيه صحاب.
وياما غُرب بياكلوا خيرنا وأسف وحدي من التراب
وإن أي غريب يجينا
م الصحرا وللا من المدينة
راكب جمل ولا سفينة: البيت دا ليه والغربة لينا.
ليه العجب؟ ايه الغرابه؟ ده كل شيء بقى للديابه
وخلاص بقينا احنا الغلابه
وكفايه رضيوا نعيش معاهم
من غير ما نكسب يوم رضاهم
وإوعك تقول لي ليه وليه
ده ياما ناس بتبص لينا
وإنت عارف عايزة ايه:
إنها تتغدا بينا.
—
يا ابني أسكت ما تطالبشي.
يا ابني اسكت قوم وإمشي.
لو هنفتح باب مطالب مش هنقدر يوم نسده.
مش هيجلب غير متاعب للوطن ممكن تهده.
انت عايزني أشاغب؟ وللا عايزني أشاغب؟
هو انا دلوقتي عاجب؟  لما آجي كمان أطالب:
بالحقوق .. يا ابني فوق.
انت عايز وحش كاسر يفترسني
لو هتعمل ليا خاطر روح وسيبني.
روح وسيبني.
ده اللي مش عاجبك عاجبني.
آه عاجبني.

—
وسمعتله.
وقلتله.
لو مافيش شيء تعمله غير الكلام:
تبقى ميت، والضرب في الميت حرام.
لانا هاسألك ولا تجاوبني.
بس حالك مش عاجبني.

وفيها إيه لو قلتلك

إن حالك مش عاجبني

فيها إيه؟
—
دكتور كمال فريد
—
★ لسا ليها امتحان..قرروا واحد جبان:
مشروع فشل كان هدفه أن يكون الإلتحاق بالكليات عن طريق امتحان خاص بكل كلية وليس بمجموع نتيجة الثانوية العامة،
مما يفسح الطريق للمحسوبية والرشاوي وعدم العدالة.

—

زجل: “عيدك دا عيدي كمان”
—
عيدك دا عيدي كمان يا أخويا في الأوطان
ياللي الفراعنة جدودنا    من سالف الأزمان
مكاني جوه في قلبك وليك في قلبي مكان
عشان في مصر بلدنا       كل البشر إخوان
كلمة “وطن” معناها       عزة وشعور بأمان
وناس بتبني بلدها           إنسان مع إنسان
كلمة “محبة” تلخٌَص        رسالة الأديان:
الدين رسالته الحب        والبر والإحسان.
إيدك في إيدي عشان    نرجع لمجد زمان.
وتقوللي “عيدك عيدي” وتاخدني بالأحضان.
عيد سعيد يا حبايبي  عيدكم دا عيدي كمان.
—
د. كمال فريد:

الساعة والساعة
—
جلست في وحدتي أنظر في ساعتي
أرى الثواني بها تفلت من قبضتي
ولم يكن ما ارى بها سوى صورتي
رأيت عمري أنا يمر في نظرتي
تلك الثواني هي عمري فيا دهشتي
ها قد مضى بعضها أسرع من لفتتي
تمضي وكأنها تسخر من لهفتي
ورغبتي وقفها تزيد من حيرتي
هيهات تحقيقها  هيهات يا رغبتي
رحماك يا ساعتي لا تدن من ساعتي
هبيني أوقفتك.  وليس في قدرتي
وقف الثواني اذا مرت فيا حسرتي
—
دكتور كمال فريد

—
زجل وشعر ” عن الرسالة الموؤودة”
—
الفلاح الفصيح:
صاحب القداسه المبجل  أنا الفلاح الفصيح
صوتي هيفضل مجلجل  جريء وعالي وصريح
باناديك بحق القرابة لو كنت بابا بصحيح
إديني حقي يا بابا   د الحق يرضي المسيح
—
وحقي هو المحبة.    والعدل بين أولادك
يعني ما يقدرش أنبا  يسلبني حقي قصادك
دي رسالة للدكتوراه يعني اللي يحكم فيها
ويقوللي لأ أو آه    إنسان مؤهل ليها
—
يهون عليك بستان تعيش سنين تحرته
وقبل الثمر ما يبان تلقى اللي جه بططه
وهو ما بيعرفش غير كلمتين في لسان
يعني ما يتخيرش  عن أي ترجمان
—
وانت يا بابا أمين   عايز طريق الحق
محتار تصدق مين وتقول لي آه أو لأ:
إنسان بلا مؤهل يناقش رسائل ليه؟
وهو حتى بيجهل  نظامها يبقى إيه.
—
وإزاي بيهدر كلمة دكاترة مختصين؟
وللا انت عاجبك فكرة سطوة رجال الدين؟
وازاي يا بابا تحطه على رئاسة القسم؟
دانا اللي وحدي كشفته يا حسرتي ع العلم.
—
ريح ضميرك وخلص     بكلمة منك رشيدة
عايزين نناقش ونخلص دي رساله للناس مفيدة
محتاجة لمسة حنان محتاجة نظرة سديدة
يا بابا يا انسان        دي الحكمة فيك مش جديدة
—
وانا بس ليا رجاء     اللجنه ما يكونش فيها
اللي ابتدا بعداء      وجاب عليها واطيها
يا بابا ما ينفعش    الخصم  يبقى الحكم
ده رأي ما يكسبش  ما يجيبش غير الندم
—
دكتور كمال فريد اسحاق
—
يا راعي العلم إن العلم مكتئب
على الرسالة يبكي بل وينتحب.
البطء في العدل مثل الظلم يا أبتي
لا تترك الحق يخبو ثم يحتجب
لا يقضي على الفكر أي لا يصادره 
من زانه دينه والعلم والأدب
فكن كما كنت دائما أبدا  
رمزا وقدوة ، يا أيها الأب.
—
د. كمال فريد.
—
الجرأة مش قلة أدب       والصراحه بتنطلب
ون كنت مش قادر أجامل دور يا بابا على السبب
حرمتني من حقي ليه دي حاجه أعجب م العجب؟
سامحني وإسمح لي أسامحك يا ابو قلب أصفى من الدهب:
ده إنت بابا وما دمت بابا   يبقى تكون للكل أب.
—
د. كمال فريد.
—
—
ليه يا رب بتخلي كلب     
يقدر على إنسان شريف
ما رضيش يطاطي لشخص واطي   
قلبه إسود ومش نضيف.
—
زجل د. كمال فريد إسحق

زجل: قاللي إنت مين؟
—
قاللي إنت مين؟
وبتنتمي لأي دين؟
وأنا قلتله “أنا أخوك”
يعني أبويا هُوّه ابوك
وأمي أمك
ودمي دمك
وچيني چينك
لكنً ديني مش هوه دينك
بس احنا برضو اخوات لبعض
بيضمنا أصل وأرض
والدين قناعة مايجيش بفرض
—
أنا عندي دين عليه أمين
انا وأهلي بيه فرحانين.
هوه هدية للإنسانية:
وحب خير للعالمين.
أنا ليا دين مش أي دين.
فيه قبول للآخرين.
وصاني إني “لا أدين”.
—
قاللي انت كافر.
قاللي انت لازم تكفر بدينك
قاللي انت لازم تؤمن بديني وللا أهينك
رديت سألت “طب انت إيه؟
واللي بتؤمن إنت بيه: قوللي عليه”
—
ولا قالشي ايه حلو في دينه.
يخلي غيره مصدقينه.
وانا قلتله
وشرحتله وبيٌنتله
مين فينا مين محتاج لدين؟
أنا ديني قاللي إني أحب الآخرين
وقوللي دينك قال لك ايه
اللي قاله قول عليه
وليه تخبي حلاوته ليه؟
دالناس عليه مستغربين.
بيقول لك انهب
غيرك وعذًب.
بيقول لك اقتل
بيقوللك اسبي
بيقول لك اضرب.
بيقول لك اكره، وتقول “آمين”.
دا يبقى إسمه برضه دين؟
حقك تداري وتكون حزين،
وبدال ما تقرف في الآخرين:
أسكت وإعرف تروح لمين.
دانا عندي دين فاتح دراعه للمهتدين
—
د. كمال فريد.