Dr. Kamal Ishaq

عايز اصلي عايز أصلي بص الراجل ليا وقال لي
عاوز ايه؟
عايز تبني كنيسه ليه؟
عارف لما هتبني كنيسه ايه هيكون؟
ولا تفكر يوم تبنيها يا مجنون؟
نار:
نار هتقيد في القطر المصري.
والهوجه راح تحصل دوغري.
واللي يقول إلحق اجري قبل ما يبني كنيسه جديده.
واللي يقول إرجع دوغري قبل ما آخذ فيك تأبيده.
كإن كنسيتي شر يا ناس،
ولا كإن الفكره خسيسه،
هوه خلاص ما فيش إحساس! ليه ما اقدرش ابنيلي كنيسه؟
قالوا القبطي أخ عزيز يبني كنيسه لأه.
حطوا شروط كلها تعجيز:
يبني كنيسة! غريبه حقه!
ون حققنا مره شروطكم عشان نبنيها:.
تقولوا استنوا او نحرقكم وانتم فيها
والولاعه لعبه في ايدكو
لكن برده مش هتفيدكو
ولا بنخافشي من تهديدكو.
مهما عملتو صوتنا هيعلا يوم الحد:
داحنا بنبني ولا بنخافش يوم من حد:
احنا بنبني احنا بنبني وغيرنا يهد.
ومهما يصيبنا ديننا عاجبنا وهو نصيبنا وهو حبيبنا
هاصون انجيلنا واعلم جيلنا وكل شبابنا مجد صليبنا
وأسلم رايتي لإبني وبنتي رايتي العاليه.
وهيعلوها وراح يفدوها دي هي الغاليه
ومهما نلاقي غيرنا يهد هنفضل نبني.
انا واخواتي وعم وجد ، وبنتي وابني
ومهما نلاقي الدنيا تضلم هنقيد شمعه ومش هنسلم.
وأحب جيراني واسامح تاني.
ومهما عادوني في اي مكان هأقدر اصلي.
انا وإخواتي في كل زمان هافضل اصلي.
نصلي نصلي. نصلي تمللي.
وهنصليلهم همه كمان عشان دول أهلي.
هنصلي لكم ده انتو كمان ده انتم أهلي.
نصلي نصلي نصلي تملي.

---

لسه الفرصه عشان تختاروا الغوا شروطكو.
ده النور باين ليه تحتاروا؟ داحنا اخواتكو.
ليه تعاكسونا لما نصلي ايه؟ إيه هيفيدكو؟
ده احنا كمان لما نصلي بنصليلكو.
علشان رب القدره ينور تاني قلوبكو.
ده هوه شعورنا وديننا أمرنا بمحبتكو.
دي هي أوامره قولوا لنا ايه هي أوامر دينكو؟
إوعو تقولوا ان أوامره الظلم وأكل حقوق الناس.
ايه حكايتكو دا الدين عمره ما يرضى حقوق الناس تنداس. واللي في راسه مخ يفكر.
واللي يفكر مخه ينور.
آدي شعوركم وعرفناه: كده يا اخواتنا؟
داحنا شعورنا بيناه بمحبتنا.
لكن برضه مش هنفرط في حقوق ديننا.
هنبيع روحنا ولا نتنازل عن كنايسنا.

---

عايز أصلي عايز أصلي سكت الراجل لحظه وقال لي:
إنت بطلبك ده هتخلي فتنه كبيره تحصل بينا:
تبني كنيسه ولا تعلي؟ ده انت هتبقى ما انتش منا.
ده انت لابد تكون ترللي:
مجنون عايز يخرب بيتنا.
عارف تطلب تبني إيه علشان تاخد ليه ترخيص؟
أطلب ملهى أو كباريه: غالي وطلبك يا ابني رخيص.
لكن تطلب تبني كنيسه! اعوذ بالله من طلباتك.
هي مؤامره ولا دسيسه علشان تعلن كده رغباتك؟
وإن كترت هتبقى فريسه وتدفع ثمن العند حياتك.

---

عايز اصلي عايز اصلي.
هز الراجل راسه وقاللي: إنت بطلبك ده بتهدد معنى الوحده. واديني بأطالبك انك تهمد يا ابني وتهدا.
معنى الوحده إنك تسكت مهما هتاخد من ضربات.
هيحبوك ولا حد هيشمت ويقولوا دمك شربات.

---

لأه: لأه يا ناس انا مش هاسكت: أنا هتكلم مهما هيجرى.
أنا مش هقدر تاني أفوت بعد حياتي ما صبحت مره.
ياما مرت بيا سنين ألف واكتر ظلم وكبت.
متعذب مقهور وحزين. ما عرفتش فيهم غير صمت
كنت في جره وبقت بره
أنا هتكلم مهما هيجرا.
وبتسألني أتكلم ليه؟ شوف الظلم بيعمل ايه.

---

عايزأصلي عايز أصلي:
شخط الراجل فيا وقال لي:
إوعى تزعق يوم أو تشكي: او هنقص يا كلب لسانك.
لما ننكل بيك راح تبكي يومها وتعرف تاني مكانك.
قلت يا ظالم مش راح تقدر: علشان ربي اللي بينصر.
دنا هتكلم واصرخ واحكي وإنت المولى يهد كيانك.

---

عايز اصلي عايز اصلي هب الراجل فيا وقال لي:
تعبت معاك.
امشي هناك.
ون جيت الثاني تطلب حق:
مش راح اقول لك اه او لأ:
هتروح تاني خلف الشمس.
ونكررها حكايه امس.
وتدوق اللي داقوه أجدادك علشان تعرف مين اسيادك.
قلت له اسمع شوف يا بتاع:
الدين يجي بالإقناع.
ونتو رعاع: ضاع الحق معاكم ضاع.
وانا انسان:
أنا ليا حقوق : وحقوقي بتساوي حياه.
واللي يخلي الوضع يروق: هو العدل والمساواه
فين هي حقوق الانسان؟
لما تلاقي الناس تنهان؟
إن يوم قالت عايزه أصلي عايزه اصلي في اي مكان.
حقي يا عالم وانا ما كفرتش لما طلبته وقلت إدوني.
د انت الكافر اني ما عرفتش حقي يا ظالم واديتهوني.
مش راح اخاف يوم من ارهاب ولا راح اسكت عن ترديدها:
حتى إن عملوا لحمي كباب: في النار هاصرخ في اللي قايدها:
برضه هاصلي، برضه هاصلي، برضه هصلي.

زجل الجمعة الحزينة
بمناسبة الإعتداء على الأقباط يوم الجمعة في مارس ١٩٩٠
الكل عرفوكي يا جمعه يا حزينه.
صلبوا المسيح فيك عشان ما يفدينا.
لكن ما عرفوشي مين اللي صلبونا
في كل يوم جمعه من يوم ما جم لينا.
في كل يوم جمعه في ناس بتتعبد
وناس بتتآمر وقلبها اسود
وتغوي ناس غيرها في البيت وفي المسجد
جماعه شريره هدفها تئذينا.
بيقولوا كام كلمه ومعاها كام حجه
وبعدها تلقى كل الرعاع خارجه
والشر في قلوبها ما اعرفش ليه هايجه
جايا لنا وفي ايدها خرقه ببنزينه.
قاصدين كنايسنا قاصدين محلاتنا
قاصدين مدارسنا وعملنا وبيوتنا
وحتى اطفالنا جوه حضاناتنا
ما بيسلموش منهم في قلب وادينا.
والشر ليه بيصحى في كل يوم جمعه
ويبدل الفرحه جوه العيون دمعه
لو في نفوس صالحه لو في بشر سامعة
ما كانش في مصري يعمل كده فينا.
يوم الصلاه فرصه للحب والرحمه.
ما فيش صلاه فيها للاعتداء كلمه.
ما فيش صلاه بتملا روح البشر ضلمه.
ده احنا الصلاه بتسمو كل يوم بينا.
وتقولوا في وحده بينكم هنا وبيننا،
من يوم ما جيتونا راح الأمان عنا،
من وقتها عشنا في الذل وإنهنا:
راحت كرامتنا ضاعت امانينا.
لو كنا اخطأنا ورونا أخطاءنا،
ون قلنا في وحده مين راح يصدقنا،
دي الدنيا شايفانا والنار بتحرقنا،
وكلامكم ع الوحده ما بقاش يكفينا.
عشان ما ترضونا ورونا اعمالكو:
ورونا الرحمه والحب في دينكو.
فيه دين يقول إكره وفين بقى عقولكم؟
قولوا لنا فين هي ده العقل ده زينه.
ون قولتو ده ديننا ما فيش كلام بيننا.
فيه دين يقول اقتل وتدخل الجنه؟
ده يبقى دين برضه؟ ما تفوقوا يا اخواننا.
ولا انتو من طينه وباقي البشر طينه.
دالدين في مفهومي بيرقي بيهذب.
لا يقول في يوم انهب ولا يوم يقول اسلب.
أعراض ومال غيرك واقتل كده وخرب.
الدين في مفهومنا نحب اعادينا.
لما انت يا حكومه مش قادره تحمينا،
والمسؤولين عنا ما بيسالوش فينا:
اعترفي بالخيبه وإدي السلاح لينا:
من حقنا ندافع بيه عن أهالينا.
ويا رب ما تحوج مصر لليوم ده:
لا هيبقى في وحده ولا يبقى في فايده،
ولا يبقى في ديارنا غير بس نار قايده،
وقنبله ومدفع وسيف وسكينه.
وربنا العادل اللي فدى نفوسنا:
هوه هينصرنا هوه هيحرسنا،
هوه هيحمينا.احنا وكنايسنا،
وولادنا وبلادنا وكل شيء لينا.

عجبي عليك يا زمن اغبر ومأساوي
تبلي الكريم بالمحن تجرح ولا تداوي
والعالي ما لهوش تمن والواطي بيساوي
ويلكم يا اهل المدن من وحش صحراوي
جوه دياركم سكن وللأبد ناوي

---

اللي في ارضه اتولد وكان زمان حامي
جاله دخيل اتوجد وقال أنا سامي
هنعيش هنا للأبد ضحيه وحرامي
وقال لصاحب البلد يا تبقى خدامي
وتموت هنا من الكمد يا تهج قدامي

---

ما فضلش شيء ليا من عند اجدادي
غير مله وهويه شايلها لولادي
وفي لغه هديه فيها شذى بلادي
صونوا اللغه ديه دي حق احفادي
عشت يا مصريه يا نبت من الوادي
يا لغتنا يا قبطيه عليكي بننادي