Dr. Kamal Ishaq

زجل عن د. سيد القمني حين هدده الإرهابيون بقتل أولاده ففكر في الإعتزال حرصا عليهم)

(ولكنه استمر في الكفاح رغم التهديد)

د. كمال فريد إسحق

غلطة مين ؟

باسأل روحي غلطة مين؟ باسأل غيري غلطة مين؟

واسأل كل الناس “فيه إيه؟”: سؤال مش لاقي رد عليه

وانت يا سيد ساكت ليه؟ لو هتقول كلنا سامعين:

يمكن نعرف غلطة مين.

باسأل روحي غلطة مين باسأل غيري غلطة مين:

لمَّا الضلمه تطفِّي النور لمّا الحق يبات مقهور

لما القوه بتلوي ذراعي ويكسر ليا فتوة صباعي

باسأل روحي وقلبي حزين : غلطة مين؟ غلطة مين؟

سؤال مش لاقي رد عليه. وانت يا سيد ساكت ليه؟

لو هتقول كلنا سامعين : يمكن نعرف غلطة مين.

هافضل أنادي شمال ويمين هافضل انادي وقلبي حزين

غلطة مين ؟

لو تتكسـّر الاقلام ؟ لو تتبدد الاحلام ؟ والحريه تكون اوهام: غلطة مين؟

لو تتكمم الافواه ؟ لو تتهدد اي حياه ؟ علشان راي في يوم قلناه: غلطة مين؟

لما يكون الناس خائفين: قاعده تبص شمال ويمين: غلطة مين؟

والناس خايفه من التفكير : علشان خايفه من التكفير : غلطة مين؟

سؤال مش لاقي رد عليه: وانت يا سيد ساكت ليه

لو هتقول كلنا سامعين: يمكن نعرف غلطة مين.

غلطة مين يا حكومه قوليلنا غلطة مين :
يعني انتي اللي ملومة ولا احنا الملومين؟
سبتي وِسبنا الوحش الكاسر لما بقا له ناب وضوافر
عمره في يوم ما عمل لنا خاطر و هيفترسك انتي الآخر
وهايتأمر وهايتجبر وهيتبجح وهيتهور

واللي هيسكت هيدوق اكثر واللي هيحصل أفظع وأخطر.

سبتي النار في الدار حواليكي: كان فين مخك ولا عينيكي؟
ده اللي في يوم رعيتيه بإيديكي رح ياكلك والحق عليكي
بكره هتلقيه جاي يعضك وها ياكلك كلك على بعضك.
وبعد ده كله ادينا راجعين: نسال روحنا بعد سنين:
غلطة مين؟ غلطة مين؟
قلبي معاك في عز المحنة وانت فايتنا:
يا اللي كافحت لوحدك وِحنا ياما سكتنا
عمر الفرد ما يقدر يعمل حاجه لوحده

لو قدامه جيش ارهاب ما هواش قده
جيش الخير محتاج تجميع لو عايزين الشر يضيع:
لو عايزين الشر يروح يبقى الخير نفديه بالروح
في الف جماعه للتنوير، ومش رح تبقى “ألف” كثير.
وارجع أنادي شمال ويمين بالجُملا دي وقلبي حزين:
غلطة مين؟
سؤال مش لاقي رد عليه: وانت ياسيد ساكت ليه؟
لو هتقول كلنا سامعين: يمكن نعرف غلطة مين.

قصيدة في حب مصر
قصيدة “واشعباه”
مهداة إلى كل من تمسك بمصريته
ولم يرض لها بديلا:
الدكتور كمال فريد إسحق:
قصيدة في تاريخ مصر في العصور الوسطى
عن حكم الدولتين الأموية والعباسية
وعن اغتيال الشعب المصري
على يد الخليفة العباسي المأمون
(سنة 832 ميلادية)
وقصة العرب في مصر
رقم الايداع بدار الكتب 2673 / 87
شعر: الدكتور كمال فريد اسحاق

وطني … مش بلدي عشان أنا فيه موجود
وطني … مش بلدي عشان أنا فيه مولود
وطني … مش بلدي عشان فيه ليَّا جدود
وطني … مش إسم وأرض وناس وحدود
وطني … لو حاسس فيه إن انا مرفوض
هيبقى كإنه مالهش وجود.
وطني … مش بلدي عشان فيه ليَّا اخوات
وللا عشان فيه … أولاد وبنات
ولا حتى عشان .. ده يبقى مكان .. كان ليَّا زمان:
وطني مش وطني وانا فيه باتهان ..

معنى الأوطان: إحساس بأمان

إحساس بكرامة .. وبإطمئنان.

بلدي … ماهياش بلدي
ولا أرض ابويا وجدي
ولا أرض بنتي وولدي
مش مطرح مااتولدت ولا مطرح ما اترعرعت
ولا ارض الذكريات وحكاياتي واللي فات
ولا حتى عشان فيها اتربيت
وللا اتنططت فيها وجريت
ولا حتى لعبت ، ووقعت وقمت ، وصحيت أو نمت
بلدي ما تبقاش بلدي ولا ارض أبويا وجدِّي
لو احس فيها بغربة
لو ألقى فيها محاربة هتبقى إيه غير تربة؟

وسببها أخويا إبن امي وابويا اللي ع الكره اتربَّى.

وطني .. مش اي مكان كان ليَّا زمان
فيه نكره بعض ونقول إخوان .. وطني الإنسان

بلدي مابتبقاش بلدي … لو حاسس نفسي لوحدي
لو حتى جنبي قرايبي … أو حتى جمبي حبايبي
وحبايبي بيضطهدوني … علشان دينهم غير ديني
رح اروح على أي مكان … حاسس جوَّاه بأمان
لو الاقي اللي يحبوني … واللي بينهم قبلوني
وقبلوا اسمي ولوني … وقبلوا شكلي وديني
ده يبقى بلدي عشان … وطني دا اي مكان
حاسس جُوَّاه بأمان … وباحِسّ إن انا إنسان
وبلاقي نفسي كمان …

بيحسسني بقيمتي … ويهنيني بموهبتي

وكرامته هيا كرامتي …

باحقق فيه أحلامي … والمستقبل قدامي …

والفرصة اللي بتندهني
ولا حدش فيه يكرهني
وطني.. مش اي مكان
وطني.. إحساس بأمان.

بمناسبة ذكرى شهداء الأقباط في ليبيا

التحية يا صعايدة
التحيه يا صعايده يا رجال والدنيا شاهده
يا اللي فارقتو الحياه وانتو عاليين الجباه
حتى ونتم مدبوحين إندبحتم صامدين
قلتو ديننا أغلى دين مش هنقبل دين سواه
نفسي أعرف إنتو مين؟ شهدا وللا قديسين؟
وللا أحفاد الفراعنه …إللي منهم جينا احنا
واحتفظنا بأغلي چين: چين جدودنا الفراعين
أهل مصر الطيبين إللي اتحدوا السنين
من زمانهم للنهارده
ونتو همه يا صعايده
التحية يا صعايدة.